هَيْ ضَيْعْتي د. إياد قحْوَش
بعْد البيادر ..
كوْع بالورد انْغَمَرْ ..
وْبِتْشوف بعْدِ الْكوع بِخْيال القمر
جْنَيْنات عَ شْمال وْيَمين مْشَنْكَلين ..
كوع الحلا .. " عامَدّ عيْنَك والنَّظر "
هَيْ ضَيعْتي .. وِدْيان ..
جِنِّيَّاتْها ..
بْتِرْكُدْ صَدى مابينْها وبينْ ذاتْها
وجبــال ..
حتى تْخبِّر حْكاياتْها ..
عمتكتب على الغيم بِقْلام الشَّجر
هَي ضَيعْتي ..
بالرَّعْد بِتْخَرْطِش سْلاح ..
ولوما بْعصاتُو البرْق يِضْرُب عَ الرّياح
ماانْشَقّ بحْر اللّيل وحْجابو انْزاح ..
وقِرْص القَمَر مِن طاقْةِ العَتْمِه عَبَر
هَيْ ضَيعْتي ..
وِاللَّيل،
كِلْما شَرْشَفو إْيد الفَجِر بِتْلَمِلْمو
تاتِكِشْفو ..
وْمِن قبْل ماتِطْلَع شَمِسْ تـَ تـْنَشّفوا ..
بْتِنْزُلْ تـَ حتّى تِغِسْلُو زَخِّةْ مطر
هَيْ ضَيعْتي مْنِ البحْر عم تِطْلَع زَبَدْ ..
متل التَّلِجْ ..
بَيْضا.. نَقِيِّه
بْتِنْعَبَدْ
وْمِتْلِ الأزَلْ بِتْنامْ بِسْرير الأبَدْ ..
وْبِتْفيق مابَين القَضا وْبَين القَدَر
هَيْ ضَيعْتي ..
مابَين عَين وْبَين عَين ..
غنْجِةْ وتَر مَشْدودْ َبينْ نْهايْتَين
نَسْمِةْ هَوا بِتْهِزّها عَ المَيْلْتَين ..
رِيْشِهْ
وْإجِتْ تَـ تْهِزّ عَ اللَّحْنِ الوتَر
هَيْ ضَيعْتي ..
بالسِّحْر ماإلْها حْدود ..
وْمُشْ رَحْ بْلاقي مِتِلْها بْكِلّ الوُجود
عنْها حِكي الإنسان بِكْتاب الخلود ..
وْلَو ماحِكِي الإنسان رَح يِحْكي الحجَر
هَيْ ضَيعْتي ..
الـْ فيها الجَمال بْيِعْتِني ..
كْنوز الطَّبيعةْ
مِنْ حَلاها بْتِغْتِني
وْألله اخْتَصَر في ضَيعْتي كِلّ الدّني ..
تـَ تْكون جَنِّهْ
" بالمُفيد المُخْتَصَر "
بعْد البيادر كوْع بالورد انْغَمَرْ .. وْبِتْشوف بعْدِ الْكوع بِخْيال القمر
جْنَيْنات عَ شْمال وْيَمين مْشَنْكَلين .. كوع الحلا .. " عامَدّ عيْنَك والنَّظر "
د. إياد قحْوَش
ضيعتنا مرمريتا
.jpg)
