شو الحب

[ايلي نعيم غطاس]

شو الحب

شو هو الحب إزا أنا منّي
هالخمر لوْ دبّ بقلبِك العطش
.. الخبز كلما جسمك بإيدي رتعش..
وقلّك رتوي شبعي غنّي...
شو هو الحب إزا أنا منّي
نغمة الصلا ل بتبلسم جروحك
وزنود الهنا ل عم تفرشن روحك
وقلّك رتاحي سكري تهنّي..
شو هو الحب إزا أنا منّي
دفا العطر ل عم يلوّن زرارك
ولمعة عيونك وتكتكة سرارك
وقلّك شردي سكري تمنّي
شو هو الحب إزا ما سوا منقدر
نلغي من وقتنا حروف شتقت
نمحي من شوقنا كلمة وقت
وبلا حساب سوا العمر نغمر...

[شذا نهري]

اهلا فيك يا ايلي نعيم غطّاس بموقعنا ومنتدانا الحلو واللي زاد حلا فيك وبقصيدتك الحلوة نحنا بانتظار كل مشاركاتك معنا
اهلا فيك والبيت بيتك

[ايلي نعيم غطاس]

الكلمي خلقت تا تضوي
هالعتمي بلون الشذا
كيف لولا الكلمي حلوي
واللي ماضيها شذا

[شذا نهري]

تسلم يا إيلي على هل كلمات احلوة بشكرك من كل قلبي ومتل ما قلتلك
نحنا هون عيلة وحدة غاطسة بالمحبة لبعضها البعض وإنت الغطَّاس الوحيد البارع بيناتنا
بكرر شكري لكلماتك الحلوة

[ايلي نعيم غطاس]

غاطس أنا بحروف عم يصلّو
ويرسمو الدرب للقلب الحنون
... جدودي غطسو بهالليل وفلّو
وغطستي أنا غمزي بالعيون...