شوْق

[ايلي نعيم غطاس]

شوْق

تصوّري شي دني بلا شمس
والشتي أكتر من عادتو جليد
وأنا زهرا بهالعالي البعيد
عطرها عم يرجف وما في إيد
ترسما.. تهمسلا الدفا همس..
هلقد مشتقلِك أنا.. وبزيد
.. جهنّم ونار لون المسسافي
وما فيني أغمر زهورِك الفتّحو
ولا زندي يقول لَ عطرك عوافي
بيقدر الربيع ينطر مطرحو
قد ما يضل بعمر الزمن غافي..
وأنا!؟!...نضلّو سنيني يتجرّحو
لا بقدر إنطر.. ولا العمر عيد...

[ميرنا]

بداية موفقة يا ايلي
وانشالله الى الامام

شعر لطيف وكلمات قريبة للسمع اشكرك كثيرا

[بيلسان]

تحمل كلماتك لمسة جميلة يا ايلي
شكرا لك
نرحب بك في منتدانا
ونتمنى قراءة المزيد

[ايلي نعيم غطاس]

ممنون الصبايا ع زوقن وكلماتن الحلوي... شو إلنا قيمي بلاكن ؟؟؟

[روز نخلة]

شعر مرهف الاحساس خاصة :
هلقد مشتقلِك أنا.. وبزيد
.. جهنّم ونار لون المسسافي
وما فيني أغمر زهورِك الفتّحو
ولا زندي يقول لَ عطرك عوافي
حلو حلو كتير يا ايلي انشالله الرب
بيملا قلبك بالحب اكثر واكثر لأنه أجمل ما في الوجود
لا بل هو الوجود ( الله محبة )
يعطيك العافية واهلا وسهلا فيك
:Dai3tna8:

[ايلي نعيم غطاس]

كلماتك يا روز ملياني تعبير... وحابب إهديكي هالقصيدي من أوّل ديوان إلي
" كمشة صلا"...



حدود السما

شُ فيها لَوْ حبّو بعضن كل هالناس؟
.. والسّما باقة سْرار والحب معبر...
كانو فوْق بْيِطلعو يْدقّو هالكاس
وكان الله بْيِجي عالأرض تا يسهر!

[روز نخلة]

بشكرك يا أخ ايلي على إهداءك الرائع الرائع جدا
والسّما باقة سْرار والحب معبر...
وما أجمل هذا المعبر بس ياريت الناس بتعرفو وتدخلو
وكان الله بْيِجي عالأرض تا يسهر!
والله موجود على الأرض بس نحنا مش شايفينو لندق الكاس ونسهر سوا
ليــش لأنه؟؟؟ ...لأنو ، لَوْ حبّو بعضن كل هالناس ، كان صار عندن بصيرة تيشوفو فيا
بشكرك كتير شعرك واحساسك وذوقك المرهف اللي فيه لمسة ايمان بمحبة ربنا

[شذا نهري]

يعني يا استاذي الكريم بشكرك من كل قلبي على هل شعر الحلو يلي مليان عاطفة وإحساس راقي ومرهف متلك
بالفعل شعرك كتير حلو وناعم لكن مضمونو قوي جداً
الله يديم المحبة بلوب الكل لحتى نقد نعبر هل معبر ويجي اله لعنا وتحت جناح محبتو نسهر