صدا الإيام

[ايلي نعيم غطاس]

صدا الإيام

إمات بأسْوَد’ن عم يصلو
.. ولاد لِ بحضنن مبارح رتاحو
بعمر الورد عالحرب راحو..
.. بعمر الورد رح يضلّو...
حلمن زغّر الكون وكبّرو
وبزهر لْ هالولاد شافو حالن
خلص الوقت.. ما في فصل كرمالن
لا رح بيفوحو.. ولا رح بيزهرو
... صلبان مزروعا ع مد النظر
قدام.. بلّشو الحلم يعمّرو
جداد.. عَ موعدن شوي بكّرو
قصة دنيتين تحت الحجر
.. واللي حطوهن بكرا رح يموتو
من حرقا من جوع من غصّا
من ظلم من حرب من قصّا...
... فلّت حياة البشر من بيوتو
وإزا بتاني دني هالكون قام
بيخبّر بعد ما البشر صارو قبور
وحدن لْ ضلّو غربان القصور
ودهب بلاكينن... وصدا الإيام...