سهرة العشاق

[ايلي نعيم غطاس]

سهرة العشاق



بنص الليل بتشرد نسمي
بتطفي الشمعا جوّا البيت

فوْق النجمي تخبّي نجمي
وإنتا جايي عالسكّيت..!!

بعتم الليل بشوفك جايي
وهالدنيي كلاّ مضوّايي

تقللي العشاق مساكين
ومين اللي بيفهمهن مين

غيْر النسمي وكاس الليل
وخوف الفجأ وقهر الويْل
ونقزة هالقلب .. ويا ريْت..

.. فوق النجمي تخبّي نجمي
ونحنا نحكي عالسكّيْت..!!


.. وقبل الضو وظلم الشمس
نعمّر دنيي بحب وهمس

ودرب البوكرا بهالإيام
نفرشها بوعد الأحلام

وسهرة حب العمر تصير
تبقا الدنيي ونحنا نطير

إنتا تغنّي بهالعتمي
وقنديلي يضوي بْلا زيت..

.. فوق النجمي تخبّي نجمي
نحنا نغنّي عالسكيت..!!


ندوّب كل الليل بكاس
ونتضحّك عَ كل الناس

حواليْنا جوقة نسمات
تغنّي للحب الآيات

ونحنا نحنا غرقانين
بعتمات الليل الحلوين

... ويضوي الضو.. تقوم تفل
وتا تبقا حدّي تمنّيت..

.. فوق النجمي تخبّي نجمي
وإنتا رايح عالسكيت..!!!

[روز نخلة]

حلو .. حلو .. حلو
الله يعطيك العافية
برسلك سلام مع كل هبة نسيم
تتقلك ما أحلى من الحب بكل
هالدني
لو كل اتنين حبوا بعضن
ولوكل واحد ضوا شمعة
كانوا قتلوا الظلمة كلها
الموجودي بهلكون

[شذا نهري]

كاس ربَّك يا مسيو إيلي بالفعل انربط لساني وما عدت قدراني أحكي شي ولا علِّق بأي تعليق على هل شعر الرائع والمميز
يعني من كتر مانها حلوة هل قصيدة بكل مافيها من إحساس وشفافية وصدق خلتني اقراها بكل أحاسيسي لأنها كاللوحة يعني بتترك لخيال القارئ مجال واسع لتصوير ما تكتبه في قصائدك وهذا إن دل على شيئ فهو يدل على شيء واحد فقط هو صدق إحساسك وشفافيتك المطلقة أثناء الكتابة بهنيك من كل قلبي على هذا النسج والحياكة الرائعة لقصائدك وانا بانتظار المزيد والمزيد من هذه اللوحات الشعرية المُبدعة.............بس مارح إبقى عل سكِّيت

كل الحب والتقدير لإبداعاتك مسيو إيلي

[جوليا]

وعالسكيت رح اكتبلك
حلو شعرك
حلوة هاللقيا
تسلم مشاعرك
بنبض القلب تخطها